一、1995年上演的電影《郵差》，予Neruta成做全世界通人知。故事講的是Neruta流亡到義大利的一个小島，在地的郵局臨時聘一个少年人，專工送批予Neruta，tsuân有法度識似這位大詩人，拍開伊對愛情、政治和詩的窗仔門，人生大大來改變。

二、紲來，咱來聽順聰我寫的，王眉配音老師唸讀的，Neruta的紹介。

三、Neruta十歲起手寫詩，十三歲開始發表，十九歲自費出版第一本詩集《霞光》（hâ-kng），隔轉年二十歲，《二十首情詩和絕望的歌》這本詩集，予伊轟動規的中南美洲，伊內底真濟媠氣的字句，成做人人攏會曉背，情人用伊的詩句來訴情衷。甚至有一改Neruta佇酒吧拄著兩陣少年人欲捙拚，伊險險變事主起hông拍，想袂到，欲共搩落去彼的人，知影伊是Neruta，tsuân來轉變，感謝伊的情詩，予伊來逐著伊的女朋友，情詩的力量有影大？

四、咱這馬來聽，王眉配音老師唸讀的，對《二十首情詩和絕望的歌》摘出來的，〈今夜我會當寫出〉，這予我想起阮大漢查某囝欲出世，阮和阮某的一个無蓋浪漫的代誌。

五、閣來，Neruta毋但𠢕佇咧情詩，伊閣有關於政治、土地、歷史和真前衛的作品。伊嘛是一个哲學家，對天地人間有濟濟的憢疑。這收錄佇過往進前寫的《疑問集》，伊鉼落來三百偌个天地的大哉問。咱那聽，那來開破。

六、這集的Neruta華語翻譯，全是對陳黎、張芬齡華語翻譯來的，in這對翁仔某，毋但寫了好，閣翻譯真濟詩，對咱台灣詩壇的貢獻真大，佇遮共in大大感謝。