本集《暢樂客語屋，WOW！》用「堅持就有力量」做主題，對校園街訪到親子分享，分享在困難中學會堅持个意義摎價值。在校園街訪中，問學生仔識有放棄个經驗無，一個學生仔講著準備段考讀書讀到當𤸁，尤其係數學分佢有想愛放棄个想法；另外一位學生仔講著面對夢想恁遠時識想愛放棄，毋過想起自家煞猛恁久吔，決定繼續堅持。
節目乜邀請著國中生雯竹摎厥个媽媽淑惠來分享。雯竹對小學三年生開始學鋼琴，一開始試著生趣，毋過後來堵著困難輒輒練到噭，甚至講出無想再過學个話語。毋過淑惠媽媽無監妹仔繼續練琴，顛倒鼓勵佢設定細目標，比將講摎一條較難个曲仔練好後正來決定愛繼續學琴無，分雯竹在一步步完成个過程中，重新尋著學琴个成就感。最尾雯竹挑戰成功，毋單淨繼續學琴，還準備參加比賽，展現佢堅持个成果。
節目盡尾，鼓勵聽眾朋友每一個夢想个實現，都需要毋放棄个過程，提醒大家：「一步一步來，毋放棄」，逐儕人都有機會偎兼自家个夢想。
