本集《暢樂客語屋，WOW！》主題係〈想像力打開新世界〉，透過校園街訪摎親子對談，帶等聽眾朋友共下行入細人仔對未來世界个豐富想像。校園訪問問學生仔對未來世界想像，學生仔个回答各式各樣，比將講有AI先生个虛擬實境教室、斯愛講話就做得寫好作業个AI系統、無手機仔个生活，甚至還有做得做伴、做家事个智慧機器人。

續下來个節目訪問吔親子來賓——雯竹摎雃个媽媽淑惠，雯竹分享佢心肝肚未來世界个畫面，包括會教學又會因材施教个AI先生、會變做電視仰係會做鑊仔个智慧壁、還有無需要飼料、毋會發病仔、做伴一生人个電子寵物。這兜想像都顯示出小朋友對未來科技个想望摎創意。

雯竹媽媽用家長个角度補充講，佢肯定細人仔个想像力，乜希望未來科技做得摎人𢯭手省時間，分屋下人有還較多相處摎互動个機會，毋係緊無閒做事抑係滑手機仔。

節目內容展現出科技摎人文个對話，毋單淨鼓勵細人仔發揮創意，乜提醒聽眾朋友愛儆惜人摎人之間共下个時光，邀請大家打開想像个窗仔，分夢想自在个飛。