本集《暢樂客語屋，WOW！》以「新技能帶來無共樣个生活」做主題，透過街訪摎專訪，鼓勵大細朋友勇敢來學習新技能，開展無共樣个人生體驗。節目一開始个校園街訪，訪問學生仔這恁久想愛學个技能。有个學生仔想學熱舞，乜有學生仔對電子作曲十分有興趣，還誁著當中意日本樂團YOASOBI个作品，展現出後生朋友多元个夢想摎熱情。

續下來，主持人敏莉摎瑜琦分享自家這駁仔想愛學个新技能，比將講畫圖毋單淨做得放鬆紓壓，乜係逐齊人做得去試看啊个創意活動。親子來賓雯竹摎厥个媽媽淑惠，分享一開始會驚畫圖到好畫圖个轉變過程。雯竹透過媽媽个鼓勵摎定期學習，毋單淨解決對畫圖个愁慮，還發展出興趣。淑惠媽媽乜講著，畫圖分佢摎妹仔有吔還較多親子共享个時光，到今屋下个壁項還設有「細畫廊」，展示雯竹盡有想像力个作品。

節目最尾，摎大家分享一隻觀念：學習新技能無定著愛幾困難抑係幾複雜，像畫圖恁樣簡單又較該做个活動，就做得打開細人仔觀察世界个眼界，乜促進家庭關係。鼓勵聽眾朋友乜做得來試看啊學習新技能，無定著就會發現一個分你想毋著个新興趣。