本集《暢樂客語屋，WOW！》以「學習困難个應對方法」做主題展開討論。節目開頭，來到校園街訪同學在學習堵著困難个時節會仰般做；有个學生仔表示會請教先生，有个會問屋下人抑係同學，乜有人會先莫去想，甚至會上網查資料，還有人講著會使用 ChatGPT 做為求助工具。可見得大家在面對問題个時節，都有自家个解方。
續下來，節目邀請光復國小六年生个學生仔育璿來分享厥个經驗。佢講在學習數學分數摎小數个混合運算時，因為內容複雜又過先生教到忒遽，分佢試著頭那痛識想愛放棄。好得阿姆鼓勵佢毋好驚困難，愛一步步來。育璿用「先簡單，後複雜」个學習策略，先做加減再過做乘除，總算尋著解題个節奏摎信心。
節目包尾，主持人摎來賓用諺語來鼓勵聽眾：「毋怕萬事難，就驚怕麻煩」，斯愛有心，無學毋曉个事情。希望逐個學生仔都做得勇敢面對學習个挑戰，尋著最適合自家个學習方式。
