這集《暢樂客語屋，WOW！》以「莫驚做毋著」做主題，討論失敗个價值摎對這裡背學習个可能性。節目一開始个校園街訪，學生仔分享佢兜做毋著事情个經驗，像係上課啄目睡、寫作業拖拖挷挷抑係考試會漏題，乜聽佢兜提出改善个方法。
續下來節目訪問親子來賓雯竹摎淑惠媽媽分享佢兜親身个經驗。雯竹講有一擺毋記得帶作業，分先生請去講話个經驗，該央時佢試著心肝肚當艱苦，轉屋下就摎媽媽討論解方，決定逐日睡目進前檢查書包仔，對失敗來學習、養成好習慣。淑惠媽媽就鼓勵女兒面對錯誤，認為「做毋著」毋係壞事，斯愛肯改進，就係一個學習个好機會。
節目強調，做毋著事情係逐儕人成長過程个一部分，係做得正面來看親子溝通，毋單淨𢯭手得著細人仔負責任，乜做得訓練解決問題个能力。做毋著事情毋係一個結果，顛倒係向前進步个重要一步。係講聽眾朋友下二擺堵著困難，莫先罵細人仔，先摎細人仔共下尋方法，對做毋著事情裡背來學著仰仔去面對未來。
