彼工我佮阮查某囝有看彼个『忠犬小八』彼齣電影，『李察基爾』，伊彼故事，我感覺莫怪人講「狗」是咱人上好的朋友，因為這个教授伊算是佇別的所在上班，毋過伊逐工上班攏會坐火車。兜飼的彼隻狗偌乖咧，逐工攏會綴伊去火車頭按呢，送伊的主人上火車，(上班)。若下班的時間到，伊就緊來火車頭等伊的主人按呢。一冬、一冬按呢逐工咧送，偌忠心咧。尾仔這个教授因為破病過身，毋過這隻『小八』伊嘛仝款按呢，(踮遐等)，時間若到就蹛遐等。一工、兩工攏等無伊的主人，毋過伊等無主人伊袂講我翻頭隨走，伊嘛是繼續等落去。尾仔因為天氣較冷，這隻狗仔一冬、兩冬按呢一直等，等到尾仔消瘦落肉，尾仔就往生去矣，所以真正「狗無嫌主人散」，「狗」真正是咱人上好的朋友。