就親像這改奧運，我感覺咱咧拍山球彼个，『高爾夫球』的潘政琮，我會記咧若潘政琮。伊第一回合57名爾，我想講「慘矣!」，(想講無望矣)，強欲無望矣。第二工伊繼續拍拚，變34名。7月31開始，第三回合閣來矣，我感覺咱臺灣人就是按呢，有氣力就一直拚、一直拚，變做偌濟？17名呢!8月初一第四回合，拚甲變7个人攏變第三名，(有通拚)，有通拚，有著牌的希望。講實在咱臺灣，這奧運呢，奧運欲提牌無簡單。所以有時看這比賽嘛是仝款，「好酒沉甕底」，另外一種意思就是按怎？就是愛「堅持到底」，這足重要，上驚你做代誌按怎?「頭仔興興，尾仔冷冷」，講實在「虎頭鳥鼠尾」，哪有可能會成功?沓沓仔來、寬寬仔是，「好酒沉甕底」。像以早人彼歌廳秀的時陣，上有名、上大牌一定佇頭前抑是後壁？(押尾)，押尾，所以這就是啥物意思？「好酒沉甕底」。