「囝婿是半子。」你拄才講的彼種狀況，咱日常生活當中嘛定定聽著相關的俗語，像講:「丈姆看囝婿，愈看愈可愛。」(愈看愈可愛)，阿如，你想看覓，就你做人查某囝，你的立場，你欲按怎解說這句:「丈姆看囝婿，愈看愈可愛」?囝婿若對查某囝好，當然愈看愈可愛。其實嘛算是:「惜花連盆，惜囝連孫」的彼種概念。我若對囝婿好，囝婿就會對阮查某囝閣較好，其實有時嘛是這種觀念。你拄才講著恁老母，若恁轉去恁兜的時陣，恁老母攏會攢真濟物件，煮一桌有夠大桌，咱以早俗語嘛講:「囝婿一下到，雙跤挵挵做一灶」，啥物意思？就是欲走去灶跤煮食。