咱今仔日就來介紹佮食 食有關的俗語 。 人講 「 有錢無錢，也著腹肚圓 」、「千辛萬苦，為著腹肚」、「 講著食，爭破額 」，可見食會飽是上基本的要求。為著欲顧腹肚，逐家就愛拚甲欲死欲活，才會當食一頓粗飽，不而過上驚拚到尾仔，竟然是「大腸告小腸」，枵甲欲死，按呢就真害。「食愛照三頓，睏愛照時陣」，一切愛照起工來，才會當有健康的生活。

阿如，講著食食，你敢知影咱臺灣人請人食飯的智慧?安住老師，我當然知啊。欲請人食飯就愛先知影對方的興趣，因為一人興一味，有人興燒酒、有人興 豆腐，有人燒酒配鰇魚，有人大腸炒薑絲，有人三層炒筍絲，逐家佮意的物件攏無仝，所以欲請人客進前一定愛先探聽清楚，人客才會當感受著主人的用心 。咧準備煮食的時，千萬毋通熱情過度變做衝碰，尤其袂當傷兇狂，毋通舞甲「刣椅仔煠木屐」，按呢就傷譀矣。