安住老師，歹勢，借問一下，你敢有看著我的手機仔,揣規晡，攏揣無，誠害。
阿如，對現代人來講，手機仔是誠重要的物件，若無去會真麻煩，橫直錄音室細細間仔，物件袂講足僫揣，不如咱這馬就先來揣看覓。咱桌頂、桌跤攏揣過，紲落來，我看咱來揣皮包仔好囉。請你認真共皮包仔內底的物件一項一項提出來，凡勢手機仔就囥佇皮包仔內底。
哪有可能 我拄開始，頭一个揣的所在就是我的皮包仔，既然老師你按呢講，我就罔揣看覓。咦安住老師，手機仔真正就佇皮包仔內底呢
阿如，你真正是「 大目新娘揣無灶 」。趁這个機會，我就順紲共觀眾朋友解說一下。這句俗語的來源是有故事的，伊的意思是講以早有一位新娘拄嫁入門,對翁婿兜的環境無講足清楚，因為毋知影物件囥佇佗位 ，致使定定咧揣物件。頭一工中晝欲煮飯矣，伊竟然緊張甲連遮爾大的灶嘛講揣無，實在有夠譀 。這種情形嘛有人講「大目新娘無看見灶」、「大目新娘，有看鼎，無看灶」，較細跤的鼎有看著顛倒較大跤的灶無看著，實在真奇怪。會發生這種狀況，阿如，你敢知影原因出佇啥物所在
安住老師，聽你按呢解說 我想無論是 「大目新娘無看見灶」、「大目新娘，有看鼎，無看灶」 抑是 「大目新娘揣無灶」 ，應該是講做代誌的時陣無夠認真。像我頭拄仔明明有佇咧 皮包仔 內底揣來揣去，揣規晡竟然會揣無，就表示我無認真、無用心去揣才會按呢。