「番薯好食免大條」，就是講有路用閣肯做的人，一个就有夠。做工課按呢，厝內翁仔某代更加是如此，「一某無人知，兩某相卸代」，有的人是講 :「一某無人知，兩某見笑代」，這兩句攏是提醒，咱厝內若有大某細姨 ，因為欲爭取家己的權益，加減有無仝的想法，規家伙仔就會不時冤家量債，逐日吵來去、吵甲「 翁張毋蓋被，某張毋食糜」，冤甲厝邊頭尾逐个攏知，講恁翁仔某是「 門扇枋鬥毋著爿」抑是「 門扇枋鬥袂密」，街頭巷尾共恁兜的代誌當做是笑詼來看，真正見笑代、卸世眾。