「爛塗袂糊得壁 」就是 『朽木不可雕也；糞土之牆不可杇也。』 的意思，是講伊這个人真正毋是人才，閣毋認真學，無法度栽培的意思，老師會罵這句話，是因為有的囡仔，實在傷毋是款，做先生个才會用來罵伊。不而過這是以早，今馬的老師無人敢遮好膽矣。而且這句話是孔子公罵伊學生的話，講平常時仔無認真，老師共苦勸閣毋聽，就親像舊漚臭的柴箍，是無法度用來雕刻；足垃圾个牆圍仔，毋免閣再油漆仝款，表示孔子公對這个學生誠慼心，無想欲共栽培。啊若「頭燒燒，尾冷冷 」是講學生囡仔做代誌、求學問，干焦有短期的熱度，做無偌久就想欲敢若 「快興退 」、「虎頭鳥鼠尾 」按呢。