「食飯皇帝大」、「先顧腹肚，才顧佛祖」，既然按呢，咱今仔日就先介紹一寡佮「食」有關的俗語。有的少年人靠勢身體勇，對食、睏攏無注重，其實以早咱祖先就共咱講:「趕人生，趕人死，趕人食飯無情理」，意思是講食飯是足重要的代誌，就算按怎趕緊，嘛袂當佇食飯的時陣來亂。另外，俗語講:「早頓食飽，中晝頓食巧，暗頓半枵飽」，這就是食物件的學問。透早起來誠需要補充營養，而且下早七點到九點是胃消化上好的時陣，莫怪祖先教咱早頓著愛食予飽，作穡做到中晝，咱嘛愛共補充寡，毋過，嘛袂當食傷濟，「貪食無補，落屎艱苦」，所以中晝頓食巧無咧食飽。到暗時仔下班，更加毋通食傷濟，予咱的胃腸會當好好仔歇睏，遮就是暗頓半枵飽的道理。