今仔日「臺語小字典」單元先來佮大家分享食茶講好話~~

食茶就是「食新娘茶」 伊的用意是：以前少年男女交往無自由，大部分是媒人紹介，新娘嫁入門，對翁婿彼爿的親戚無熟悉，就利用「食新娘茶」的機會來相捌。新娘捧甜茶予親戚長輩的時，媒人婆會一個一個紹介；這是大舅公 這是大伯公 三叔公 這是大衿婆 大姆婆 二嬸婆  長輩喝茶了愛送紅包予新娘作見面禮，佇新娘欲收茶甌的時， 長輩要共紅包囥佇茶甌內底，順紲用好話來祝福新娘。

這好話通常是有押韻閣好聽 意思直接表達，予人一 聽就聽捌，聽著就歡喜快樂 ，佇喜事熱鬧的場所，會曉講好話 一方面表達講的人臨場的表現佮口才，一方面講吉祥的話予聽著的人喜上加喜，予氣氛更加鬧熱，咱今馬就來分享寡食茶講好話。

茶盤圓圓，甜茶甜甜，今夜着變，冬尾雙生。

1. 茶杯圓圓圓，互恁富貴萬萬年。
2. 茶杯深深深，互恁翁某會共心。
3. 茶杯囥桌角，互恁田園相紲學。
4. 茶杯捧正正，互你會得眾人疼。
5. 茶杯捧懸懸，互恁囝孫中狀元。
6. 茶杯捧下下，互恁趁錢無底下。
7. 茶杯捧過來，互恁逐家大發財。
8. 茶杯捧過去，互恁逐家有福氣。
9. 茶米飲落喉，互恁逐家會出頭。
10. 茶米飲一喙，互恁榮華兼富貴。

台灣話的四句聯仔，會使講是台灣民間文學上重要的文化遺產，咱逶(ui2)即款的表現方式，會當看出台灣人的樂觀、笑詼、心適的民族性格佮語言的特性，十全十美表現出即塊土地的聲嗽 母語的奶芳。向望逐家攏來重視學習，共伊化做台灣文學的肥底。