喙會成人，嘛會傷人，俗語講得好:「心歹無人知，喙歹上厲害」，意思是講就算是一个心肝無好的人，只要伊無講出來，別人無一定會知影；毋過，若是講話無站節，烏白共人剾洗，彼支喙就會成做傷人的武器，連鞭就會予人看破跤手，所以「心歹無人知，喙歹上厲害」這句俗語就是提醒咱講話愛細膩，毋通「一句話三角六尖」，逐句話攏傷著對方。