一枝草，一點露
只要有塗的所在，你攏看會著有草仔發出來，閣會當佇彼个所在生存落去。毋管生存環境偌艱難、偌焦燥、地勢有偌懸，逐工透早，無論你大細懸低、佇佗位，每一枝草仔頂頭攏會有露水。毋若按呢，風若吹，每一枝草仔攏會做伙搖來搖去，可見天公伯仔對攏是公平對待。所以若有人為著生活、為著感情，抑是職業拄著無順利、鬱卒、操煩的代誌，甚至是想袂開的時，我攏會共講:「一枝草，一點露」，只要你拍拚，一定有機會來改變目前的狀況。
巷仔口的臺語
- 首播日期 :
- 2017/09/04
- 主持人 :
- 鄭安住
臺灣台語教學單元
節目內容以教育部臺灣台語常用詞辭典俗諺為架構，搭配時事或故事，以輕鬆的題材為主，用對話方式進行臺灣台語教學，介紹有趣的臺灣台語。
共30集
好額毋值著會食，好命毋值著勇健
「好額毋值著會食，好命毋值著勇健」，我想食物件嘛愛注意，毋通喙白，抑就是揀食，「食魚食肉，也著菜佮」。閣有，以早老師捌講過的「早頓食飽，中晝頓食巧，暗頓半枵飽」、「暗頓減食一口，活甲九十九。」這幾句俗語，嘛是聽眾朋友欲追求健康愛注意的觀念。
一个錢拍二十四个結
錢，儉愛儉，嘛袂使儉過頭，像講:「一个錢拍二十四个結」，就是咧笑遐凍霜的人。古早時代，十二月天足寒，閣會落雪。你若走去厝頂睏，一定會去予霜凍著，閣會予你寒甲咇咇掣，毋才會講「十二月天睏厝--凍霜」。用天氣狀況的話語來形容『小氣鬼』，嘛真趣味。凍霜顧人怨，傷儉，凡勢人會笑你「虯閣儉，枵鬼兼雜唸」。
入人門，順人意
俗語講:「會做新婦兩頭瞞，袂曉做的兩頭湠」，瞞是瞞騙；湠是四界傳，兩頭就是大家官佮後頭厝這兩爿。仝一件代誌，仝口灶的人就無一定有相仝的看法，外口的人更加免講，所以做新婦的人，「入人門，順人意」、「大家有話，新婦無喙」，既然有緣嫁入去人兜，成做一家人，咱就愛珍惜這種緣份。俗語嘛有另外一句:「一人看出一家，新婦看出大家」，就是講新婦的所作所為，佮大家嘛有誠大的關係。做大家的人較有經驗，愛共鋩角教予新婦知，
忍氣求財，激氣相刣
遮爾濟人客當中，加減會有一寡漚客，姑不二三將拄著啊，嘛是愛忍耐，用笑容面對漚客，就算伊閣按怎抝蠻，兇拳無拍笑面人，所以祖先共咱教講:「人無笑面免開店」，欲做生理一定愛有笑面。總講一句，「忍氣求財，激氣相刣」，忍耐是做生理絕對愛有的本領，忍耐久就贏，尾仔才趁會著財富。毋但做生理愛忍，做人做事嘛愛忍，忍耐忍耐，萬事排解:不忍不耐，小事成大。
