各位聽眾朋友，你敢有出去旅行過？今仔日「佇厝講台語」的主題是「旅行的交通安全」。嘉芬校長佮淑惠老師邀請著臺北市復興高中的黃楷和同學做伙來開講，分享伊去旅行的經驗和愛注意的代誌。

楷和講伊佇臺北市上捷坐的是捷運抑是公車。學校定定有交通安全的宣導，好比講這馬佇捷運站用手扞的電梯，兩爿攏會當徛咧，按呢電梯較袂重頭輕。另外像捷運站的月台，有的會出現車廂這馬的人客數量的青紅燈，咱就會當去青燈的車廂人較少喔。閣有盡量莫看手機仔，注意看敢有怪怪的人。in老師有特別交代，若出去旅行，安全上重要，無論是坐車、坐船、騎車愛想著厝裡有人咧等待。

節目的尾聲有鼓勵聽眾「佇厝講台語」，嘛會使和厝內的人好好討論去旅行愛注意的代誌喔！