(臺文)

1624年（明熹宗天啟4年）荷蘭來大員彼冬
．一冬外來(1623-1624)，荷蘭ê船隻不時出入福建等沿岸，搶刼中國船隻和村莊，袂輸像海賊、強盜ê行為。

．遐--ê予荷蘭人掠去ê中國人，有ê去到澎湖作奴工，擔塗起造城堡，當中病--死ê、餓--死ê不計其數。

．另外閣一寡中國人予送到印尼萬丹、巴城，賣予當地人(荷蘭人、好額人)做奴隸。

．兩年外ê衝突、協調(1622.07.11-1624.08.27)，落尾福建巡撫南居益調動欲甲一萬名ê軍隊登陸澎湖，駐守佇荷蘭城堡ê對岸-馬宮。而且派官員去到巴城向總督抗議。

．這時雷爾森司令，佇中國人ê包圍下，向巴城討求援助，並且要求趕緊撤出澎湖。這時繼任巴城總督是卡本特(Pieter de Carpentier)。

．仝時陣，巴城總督卡本特指派宋克（Martinus Sonck）對巴城出發到澎湖，來接雷爾森的荷蘭艦隊司令ê職務。宋克8月初1來到澎湖，即時要求欲佮中國官員談判。

．仝時陣日本平戶大生理人（海商、海賊)李旦、鄭芝龍出現佇風櫃城。李旦佇日本、福建、大員自早就已經是一方之霸ê甲必丹。佇福建巡撫南居益請託之下，出面接接荷蘭長官宋克，建議對澎湖遷徙去大員。

佇鄭芝龍（尼古拉斯-一官）ê通譯之下，大明國同意荷蘭佇大員猶原會當佮中國進行貿易。

．新上任ê艦隊長官《宋克》理解著佮中國交戰無拍贏ê機會，所以接受福建方面私下ê建議，放棄對澎湖ê佔領，遷徙到當時無屬大明國政治版圖ê福爾摩沙島－大員（臺灣）。結束荷蘭東印度公司第二改對中國挑戰失敗收尾。

結論：總計荷蘭東印度公司這次佔領澎湖前後總共2冬1個半月跤兜(1622.07.11-1624.08.27)。