暢樂客語屋，WOW！

本集「暢樂客語屋，WOW！」節目主題係「仰般安排高效率个一日」，由主持人瑜琦摎敏莉帶領聽眾討論仰般有效率个安排生活摎學習時間。節目中還到校園進行街訪，了解學生仔在尞日个活動安排，大體係搞手機仔、睡目還有打球，較少講著寫作業，顯示時間規劃个重要性。

 

為著幫助學生仔提升效率，節目特別邀請光復國小个陳育璿小朋友分享自家个經驗，主持人乜紹介實用个方法，包括用行事曆區分「學習」、「工作」摎「運動」時間，還過搭配「愛辦清單」列出逐日3到5項重點事項，優先處理重要个事情。另外，推薦「番茄鐘工作法」，透過25分鐘專心摎5分鐘歇睏个節奏，提升學習效率乜較毋會𤸁。

節目盡尾乜提醒聽眾愛安排適當个歇睏時間，比論講睡目前花5分鐘想看啊該日做个事情摎調整第二日个安排。透過這兜方法，扌帣手學生仔把握時間，養成好个習慣，提升一日个效率。

本集《暢樂客語屋，WOW！》節目以「番茄鐘」做主題，介紹提升專注力个好方法。主持人瑜琦摎敏莉透過校園街訪，發現學生仔在寫作業个時節較會分心，像係摸這摸該無就看手機仔个訊息分心，影響學習效率。

故所，節目深入紹介「番茄鐘工作法」，就係設定25分鐘專心學習，續等歇睏5分鐘，分大腦恢復專注力。兩位特別來賓親子檔立琪媽媽摎育璿乜分享實際使用个心得。育璿講，佢會用手機仔設定計時器，專心寫作業，在歇睏个時節食茶抑係活動，恁樣佢做得繼續保持注意力。厥媽媽建議佢用咧這方法後，佢試著學習變到輕鬆有效率。立琪媽媽乜講，短時間集中精神比長時間个專心效果還較好。

 

節目鼓勵大家摎「番茄鐘」用在課業摎日常生活裡背，毋單淨提升效率，乜較毋會悿摎分心，係一種適合大家做事、讀書个實用工具。包尾提醒大家儆惜時間「一寸光陰一寸金」，養成好个學習習慣。

 

本集《暢樂客語屋，WOW！》以「圖書館Let’s go」做主題，看學生仔仰般善用學校圖書館。節目一開始透過校園街訪，發現學生仔對圖書館个看法多元，有个人摎圖書館準做查資料、寫作業个秘密基地，有个人好借漫畫像《歷史漫畫》、《科學漫畫》，乜有學生仔認為圖書館係準備考試摎參加書展个好所在。

 

主持人瑜琦摎敏莉試著，雖然這下个學生仔當慣用3C產品，毋過學校圖書館還係當重要个學習資源。節目特別邀請陳育璿小朋友來分享，佢輒常利用圖書館讀各類型个書，特別中意思科幻小說像《神奇柑仔店》摎《波西傑克森》。學校逐隻月舉辦主題書展，乜會邀請作家來演講，分佢收穫豐富、看書个興趣還較高。

 

另外，育璿乜講佢從細有阿姆做伴共下去圖書館，培養咧好看書个習慣。節目盡尾引用俗諺「家有萬金，毋當藏書萬卷」鼓勵學生仔儆惜學校个圖書資源，養成好个閱讀習慣，分知識變做人生寶藏。

本集《暢樂客語屋，WOW！》討論抑般摎同學建立良好个關係。節目校園街訪學生仔仰仔分享摎同學交朋友个方法，像係共下搞還有互相扌帣手；係堵著冤家个時節，會主動開嘴、請對方食東西抑係先會失禮，展現細人仔个智慧摎燒暖。

 

本集節目邀請著得人惜个兩子哀雯竹摎厥媽媽淑惠，共下分享日常个人際互動經驗。雯竹表示，摎同學共下搞，乜會有誤會个時節，毋過佢學著用心聽別人講話、毋係緊講自家个看法，會分朋友還較肯摎佢分享。另外，佢還會主動邀請同學共下做課堂活動，增加互相了解摎感情个機會。

 

淑惠媽媽補充講，好个人際關係就像種花，愛用心淋水摎維護。佢乜鼓勵雯竹用「亻厓試著……」做為表達感受个方式，正毋會傷害著對方，分溝通較順序。

 

節目盡尾提醒大家，建立友誼愛對用心聽、好好表達摎主動關心做起，斯愛肯去做，逐儕人都做得有珍貴个同學感情。

 本集《暢樂客語屋，WOW！》以「校園情境佈置」做主題，討論本土語言仰般在校園空間活化摎推廣。主持人瑜琦摎敏莉邀請著客語家庭兩子哀育璿摎厥媽媽立琪，共下分享校園裡背个客語佈置實際情形摎學習成果。

 

育璿講，學校廊仔設有當多客語標示，像「運動坪」表示操場、「便所」表示廁所，男女廁所會標示「細倈仔」摎「細妹仔」。另外，校門口還設有客語拼音个「歡迎光臨」，公告欄乜會貼客語諺語，像「冬瓜大，好上菜；鹹菜細，好上臺」，希望分學生仔定定仔就學習著母語。

 

立琪媽媽認為，這兜設計毋單淨生趣，還做得分母語自然融入細人仔个日常生活。節目裡背還講著「掃地掃壁角，洗面洗耳角」恁樣个客語俗諺，傳達出生活智慧，乜鼓勵細人仔做事情愛用心、做毋得儘採。

節目盡尾乜希望學校共下來推行本土語言情境佈置，分學生仔在生活裡背自然學習著母語，摎同學就做得共下體驗語言个生趣摎價值。