巷仔口的臺語

上尾仔一集就來講寡佮感謝報恩有關的俗語。頭一句俗語是「食人一口，報人一斗」，嘛有人講「食人一口，還人一斗」、「食人一斤，也著還人四兩」，毋過，我咧想，人共咱鬥相共、鬥跤手，咱無應該用「還」的概念，應該愛有「報恩」的行動。別人的恩情，咱毋但愛謹記在心，閣愛感恩惜福、知恩必報、加倍報答，按呢才是正港的臺灣人。

交著好朋友會相牽成，上驚交著歹朋友，「佮好人行有布通經，佮歹人行有囝通生」、「人牽毋行，鬼牽溜溜行」，按呢就害矣。俗語講:「人交的是關公劉備，你交的攏是林投竹刺」，就是講別人交的朋友攏是關公、劉備這種正人君子，是按怎你攏交一寡王哥柳哥的歹朋友咧?交朋友愛特別注意，目睭愛褫予金。

「趁錢有數，性命愛顧」，巧的顧身體，戆的顧家伙，身體是家己的，家伙是囝孫的，尤其袂當為著趁錢，為非糝做，趁一寡失德錢，愛知影「僥倖錢，失德了；冤枉錢，跋輸筊」，這是咱祖先的教示，聽眾朋友做生理的時，千萬愛謹記在心。

「歹竹出好筍」。講話的人本意是欲呵咾囡仔，對方的爸母聽人咧呵咾，雖然予人剾洗，嘛是會笑笑仔接受，袂去佮人計較。若是欲強調別人的表現超出咱平常時仔對伊的印象，咱就講:「烏矸仔貯豆油」這句孽譎仔話就好，後壁才接「無地看」，千萬毋通講「歹竹出好筍」來共人剾洗。

「好額毋值著會食，好命毋值著勇健」，我想食物件嘛愛注意，毋通喙白，抑就是揀食，「食魚食肉，也著菜佮」。閣有，以早老師捌講過的「早頓食飽，中晝頓食巧，暗頓半枵飽」、「暗頓減食一口，活甲九十九。」這幾句俗語，嘛是聽眾朋友欲追求健康愛注意的觀念。