131 - 有量就有福

咱以早嘛捌聽過一个故事，叫做『宰相肚裡能撐船』，這是三國時代，諸葛孔明，我險仔講去豬哥亮遐去。諸葛孔明過身了後，伊共內底一寡代誌攏交予一个下跤手人叫蔣琬。蔣琬這个人伊較有肚量，毋過伊下跤有一个人叫楊戲，姓楊的這个較各馝，就是講較無愛佮人講話。你佮伊講話，伊攏激一个參仔氣，無啥愛插你。有人就共蔣琬講:「你這馬是宰相，是按怎你佮楊戲講話的時陣，伊無啥愛插你，(你毋就足無面子，應該共壓落去)，你宰相啊、你大官啊，你哪會予伊遮爾聳鬚。毋過蔣琬伊講，一个人一个癖，伊的個性就是按呢，我咧講話的時陣伊若感覺有理，伊就講:「嗯，按呢好。」伊袂閣共我講:「宰相，你哪會遮有智慧，你哪會遮爾巧?」像這欲共人扶扶挺挺的話，伊袂曉講。毋過若拄著我的想法佮伊的想法無仝款的時陣，伊就感覺這愛考慮，伊就袂閣繼續共我黜臭，驚我無面子。所以我感覺這是伊的個性，橫直咱尊重伊的專長，若提出意見的時陣，我看伊的表情我大概就知影，伊是贊成抑是反對，所以我有法度尊重伊。人就講彼真正是『宰相肚裏能撐船』，有肚量，所以「有量才有福」，顛倒尾仔楊戲嘛共伊幫助足濟。