34 - 大航海時代-酒作茶喝

佇17世紀ê臺灣，因為無仝民族ê遷徙佮交流，因此食材和料理出現多元融合ê面腔。比如園稻（旱稻）、薏仁、豆仔類、麥仔佮高粱等。其中米毋但是主食，閣是激酒重要ê原料，當時ê唐山贌商就是用米激燒酒販賣，這種米酒也成做山客社群間普遍受喜愛ê酒品之一。有關米ê種類，早期臺灣原住民主要耕作ê米是園稻（旱稻）；一直到漢人大量來臺以後，中國稻作尖仔米（秈稻）佮秫米（糯稻）才取代園稻（旱稻）普遍性ê種作。

除了燒酒（米酒），麥仔酒（啤酒）佇當時ê臺灣嘛有紀錄。佇1654年8月31《熱蘭遮城日誌》講著「mom」 啤酒（歐洲ê一種啤酒），其實就是現此時德國ê「mumme」 啤酒。

當初時對歐洲到亞洲ê航程遙遠，一路遠囉囉（4個月到半年／甚至9個月以上）。另外一條航線，歐洲-美洲墨西哥-東南亞約3個月。若荷蘭帆船對巴城到台南大約半個外月。西班牙帆船對馬尼拉到基隆大約一禮拜跤兜，所以船頂啉ê水非常重要，佇長時間ê航行中，一旦欠水，船員會發生脫水ê現象，若無即時補給閣繼續行船，終其尾會造成船員自殺、甚至暴力反抗。但是長時間啉ê水會變質，無法度啉。所以船頂ê飲料除了啉ê水，閣有酒品、酒類。因為啉酒除了會當取代啉ê水，閣有祛寒、放鬆ê心情，進一步閣有消毒、預防傳染病ê功能。酒類ê部份，Captain船長會照順序分發啤酒、葡萄酒，落尾才啉荷蘭琴酒等烈酒予船頂ê人啉，確保水分充足。

另外，老早佇400年前ê荷蘭文獻裡，有記錄高粱（西拉雅語：talau；大武壠語：tarau）是西南平原原住民重要ê食材。