120 - 好也一句，歹也一句

「好也一句，歹也一句」、「講話中人聽，較好大細聲」。講著講話的藝術，咱愛講人愛聽的話，有時是講你大細聲咻，人嘛無欲插你，所以俗語共咱講:「講話中人聽，較好大細聲」；「好也一句，歹也一句」，咱就愛好好仔講話。我感覺這馬上大的問題是足愛佮人諍，甚至有的人閣會:「死龜諍到變活鱉」。所以俗語嘛共咱講:「四書五經讀透透，毋捌黿guân、鼇ngôo、龜kui、鼈/鱉pih、竈tsàu。」就是笑這个人讀死冊，四書五經背足熟，顛倒日常生活當中，龜佮鱉攏分袂清楚。咱講「死龜諍到變活鱉」就是講足愛佮人諍，一直強辯、一直佮人諍，明明是死去的龜，欲佮人諍到變活鱉，根本就是強詞奪理，這種人你愈諍，人愈無愛佮你講話，所以「講話的藝術」，我感覺頭起先就愛按怎?愛「尊重對方」。所以重點佇啥物所在？愛加用耳仔，減用喙，(聽別人講啥物)。