108 - 生的請一邊，養的恩情較大天

我捌佇廣播電台聽過一个劉邦寧博士的故事，伊一出世就予一對姓劉的翁仔某收養，養爸養母共伊當做家己親生的，共伊惜命命。就算經濟困苦，不而過規家伙日子嘛是過甲幸福美滿。國小六年的時，有同學笑伊毋是人親生的，伊就佮同學起衝突，尾仔煞冤家相拍，舞這齣毋但無解決問題，顛倒傷著養爸養母的心。伊二十四歲彼年，養爸過身，嘛意外知影伊的親生老爸就是逐年攏會送伊生日禮物的王阿伯。就算爸囝相認，毋閣劉邦寧先生的內心非常明白「生的請一邊，養的恩情較大天。」嘛有人講:「生的撥一邊，養的恩情較大天」的道理，伊毋但無離開養母，顛倒閣加有孝，並且照顧親生老爸。伊有經濟學、風險管理佮保險、企業管理三个碩士佮一个企業管理博士的學位。伊放棄佇美國發展的機會，為著會當就近照顧晟養伊大漢、共伊栽培的養爸養母，決定轉來臺灣，嘛因為按呢，煞予伊佇風險管理這个領域有誠好的成就。伊是「美國國際財務金融管理學會」亞太分會的執行長，對國際財經發展有真深的了解，嘛是行政院陸委會臺商張老師，專門咧替臺商解決問題，受著濟濟企業家的尊重。伊嘛關心世界各地的弱勢族群，用實際行動參與「大中華史懷哲協會」的運作，將愛心送到全世界，這種成就佮養爸養母對伊的栽培有誠大的關係