107 - 生狂狗食無屎

講著「生狂狗食無屎」這句俗語，我就想起以早囡仔細漢的時，若拄著拜一透早欲叫伊精神，就愛叫規晡。尾仔就算起來，囡仔總是閣倒佇眠床頂躽。共講強欲袂赴矣，伊才毋情毋願起來。不而過若看著時鐘，伊就開始起生狂。想著冊包猶袂款好勢，隨走去冊桌仔揀課本、反作業簿仔，緊共鉛筆盒仔櫼入去冊包。等冊包款好，就變連鞭揣無襪仔，連鞭揣無鞋仔，閣愛咱大人來鬥揣，實在真害。咱那看手錶那喊伊緊出門，等甲伊真正欲出門，才喝講:「爸仔，我猶袂食早頓呢。」咱就共麭和牛奶，予伊紮咧，等去學校才食。兇兇狂狂到校門口，伊才想著猶袂洗喙、洗面，真正是「生狂鬼捙倒菜羹飯」，另外一句較粗的俗語就是「生狂狗食無屎」。