104 - 臺灣錢，淹跤目

以早唐山過臺灣，人講:「福建歹徛起，逐家緊來去。來去穩有某，毋免唐山遮艱苦。」臺灣以早講實在，土地較肥，種啥發啥，甚至種稻仔，以早一冬收一改，這馬會當收三改，無論你種稻仔、種果子攏足𠢕發，只要你肯認真拍拚，對唐山過來臺灣發展的人，攏趁會著錢，所以講:「臺灣錢淹跤目」是形容清朝的時陣。臺灣的發展，對唐山福建的人來講，唐山過臺灣真正袂䆀。毋過後來又閣講:「唐山過臺灣，心肝結規丸」、「十去六死，三留一回頭，毋走的是癮頭。」