146 - 近山剉無柴，近溪擔無水

有一句俗語，送予逐家來做參考，叫做「近山剉無柴，近溪擔無水。」，老師，盍會按呢？山頂毋是攏柴？當然這馬樹仔較少無毋著，毋過你若近溪攏有水啊？著阿，毋過就是按怎？你傷靠勢矣，你想講「我一定有的」、(我若欲愛我去擔就有)、「我去抾就有」。毋過若你傷晏去咧，柴攏去予人抾了了，「慢牛食濁水」，水攏濁去，所以會造成誠大的傷害。