37 - 鹿角還狗舅

古早神話傳說：狗是狼ê阿舅。

古老溯古以來鹿哥、狗舅、雞公本成是好朋友。斯當時狗舅ê頭殼頂有兩支角，顛倒鹿仔無發角。

鹿仔誠欣羨狗舅頭頂彼兩支ê角，不時都求狗舅共角借伊戴，不而過狗舅攏毋肯。所致，鹿哥揣雞公替伊苦勸狗舅答應借伊戴看覓，雞公熱心就向狗舅保證一定會共角討轉來還--你。

啥知？鹿哥角借著手，煞覕起來無欲還。狗舅三番兩次揣雞討角。雞公嘛無奈何，只好逐工透早拍殕仔光就大聲啼叫：「鹿角還狗舅！」向世間人公開鹿哥借狗角無欲還ê見笑代。

從此以後，逐工透早雞啼ê 時，攏會喝：「鹿角還狗哥」。但是攏一直無下落；所以，見若狗仔看著雞仔攏會 逐欲共咬，毋放伊煞。因為狗舅欲向雞公共「狗角」討轉來ê緣故。

☉有關「舅」ê台灣俗語

天頂天公，地下母舅公。

母舅公，較大三界公。

外甥食母舅，親像食豆腐；

母舅食外甥，若像食鐵釘。