87 - 大紅花毋知䆀，圓仔花䆀毋知

阿如，祖先的智慧教咱講「閒飯加食，閒話減講」、「飯會使濫糝食，話袂使濫糝講」，因為講人是非者，便是是非人，而且每一个人無可能是聖人，加加減減攏會做毋著代誌，咱若是定佇囡仔的面頭前批評東、批評西，講人的閒仔話，就會害囡仔綴咧學，按呢就較毋好。其實咱家己嘛無講偌厲害，袂當「攑燈毋知跤下暗」，愛知影家己的輕重，嘛袂當傷𠢕膨風，千萬毋通 「大紅花毋知䆀，圓仔花䆀毋知」 ，顛倒愛佇囡仔的面頭前，定定呵咾別人，因為「 捷講別人的優點，會予家己好經驗；捷講別人的缺點，會製造家己的危險 」，愛教育囡仔欣賞優點、包容缺點。若是有意義而且是正面的建議，就當面輕聲細說講予人聽，毋通佇背後指指揬揬，這是咱教育一个有包容心、有愛心的囡仔上起碼愛做的工課 。