119 - 在生一粒豆，較贏死了拜豬頭

老爸、老母在世的時陣，無講真有孝，毋過欲出山的時陣，辦甲有夠豐沛，(辦甲有夠大場)，陣頭有夠濟。「在生一粒豆，較贏死了拜豬頭。」序大人在世的時陣，你好好仔共有孝，就準講伊干焦食一粒塗豆，總比伊死去了後，你拜三牲五醴閣較好，因為講實在，人都往生矣，(伊嘛食袂著)，毋過在生彼粒塗豆，伊敢有食著？伊有食著，毋過你佇死後拜的遐的物件，其實攏是看袂著、食袂著，所以咱欲有孝愛把握時陣。以早古冊攏共咱教講:「千書萬典，孝義為先。」所以一定愛好好仔有孝序大人，其實:「在生毋祭嚨喉，死了才孝棺柴頭。」嘛是彼種意思。伊在世的時候，你好好仔予食，毋通死了棺柴才欲用上好的，閣愛倩真濟陣頭，其實彼攏無意思。