116 - 共天公借膽

老師，我共你講，前兩工我佇新聞看著有兩篷人佇海產店啉酒，啉酒出來毋知按怎竟然起跤動手，結果連警察來矣，竟然閣敢對警察大細聲，老師你臆看結局按怎?一定是拖去警察局，這攏嘛按呢，所以咱攏笑講:「以早攏毋敢，這馬愈來愈好膽。」因為早期日本時代，若做毋著代誌，看著警察來，就驚甲欲死。以早看著警察愛叫「大人」，這馬警察攏叫啥物你敢知？「戴帽仔」，叫「戴帽仔」閣算袂䆀。所以這馬對警察的態度已經佮以早無仝矣。是按怎會去遐大細聲喝，有的是激酒悾，其實敢有真正醉甲按呢?(我感覺無呢)，有時是酒啉落去，茫茫聽著有人唱聲就袂爽，隨唱倒轉去，你大聲我嘛無咧驚你，尾仔變做嚷來嚷去，後來就變做代誌愈舞愈大條，實在是真好膽。以早歷史故事嘛共咱講啥?「趙子龍一身攏是膽」，伊欲去救啥人?劉備囝啦，伊欲救阿斗就衝出去，所以講「趙子龍一身攏是膽」。毋過有時人傷好膽嘛毋好，像你頭仔講的遐，真正是「食一把膽」，(傷過頭仔)，甚至有時閣共天公借膽。講實在話，伊酒若無啉，攏毋敢對警察大細聲，這馬酒啉落去，邊仔閣有人替伊贊聲，膽就愈來愈大。嘛有人滾耍笑，講這就是:「鬼仔閣敢摸閻羅王的尻川」。