67 - 人飼人，一支骨，天飼人，肥朒朒

其實所謂的「天生地養」，是講古早的聖賢共宇宙、地球講做是天，咱人是天所創造的，天共咱人生落來了後，這片土地就生長各種農作物，會當養飼眾生，這就是「天生地養」的意思。毋過若是干焦欲靠人力來飼人，萬不二拄著天災地變，逐家就會瘦甲賰一支骨頭，甚至活袂落去，天地不安，人類自然難安，這就是「人飼人，一支骨」的意思；若是風調雨順、五穀豐登， 逐个人就會當過好日子，食甲肥朒朒，毋才會講「人飼人，一支骨，天飼人，肥朒朒。」嘛有人講 「天飼人，肥朒朒，人飼人，賰一支骨。」