10 - 一日掠魚，三日曝網

台灣俗語會當用「一日掠魚，三日曝網」、「一工拍鳥，三工挽毛」或者是「一日討海，三日曝網」來佮『一曝十寒』相對應，這種貧惰做代誌的人已經足害，若是拄著「骨力食，貧惰做」的人就閣較悽慘。「貧惰人，講有話」，代誌貧惰做，藉口顛倒揣一大堆，共工課攏捒予別人，一喙掛雙舌，無影話講甲規大篇。講著就厭氣，雖然平常時仔遮的人代誌無欲做，毋過若是欲食物件，規个人就精神、氣力攏齊來，用「食飯若武松拍虎，作穡若桃花過渡」這句俗語，就是上好的形容。