12 - EP12停動停動仔，精神變好咧

本集《暢樂客語屋，WOW！》用「停動停動仔，精神變好咧」做主題，鼓勵學生在下課時間適當活動，分身心健康。透過街頭訪問摎來賓對談，紹介仰般運用短短个下課時間做簡單个運動。來賓育璿分享佢最好个活動係下課摎同學去運動坪打球仔，若係堵著落水，就會在穿堂做簡單个舒展操，像係「大鵬展翅」、「轉頸根」這兜動作，幫助放鬆肩頸，提升精神摎專注力。
來賓立琪媽媽乜講，細人仔若係做得在下課時做兜伸展摎動態个活動，無單淨係解放壓力，乜做得對上課專心還較有幫助。育璿還教大家仰般用敨氣配合運動，效果還較好。
主持人強調，就算係十分鐘定定，大自家若係停動一下、笑笑仔，做得分身體摎心情變到還較好。
本集鼓勵學生在日常生活中養成動態休息个好習慣，分身體摎心肝肚都康健。