101 - 毛呼龜粿粽，紅包隨你送

môo-honn，「毛呼」這兩字應該算是借音字。以早七月時仔咧普渡的時陣，攏會用一寡糕仔類，毋過伊無包餡，有的是紅honn、有的是必桃，就親像發粿仝款，毋過伊是白色的、無包餡，這算祭拜的時陣咧用的，因為這種物件是欲祭拜好兄弟，所以序大人若共你講:「你捌一个honn」、「伊咧講一箍honn」……，意思是講，因為這「honn」是欲祭拜，欲予好兄弟仔食的，「你若捌一个honn」，你若捌，表示你是啥物？好兄弟，就是孤魂野鬼，變做是咧用鬼來共你剾洗；「捌一个honn」是咧笑你按怎？講你是好兄弟，譬相你是無智識的人，這著愛注意。有的道士，七月時仔若講生理好的時陣，凊彩人攏嘛會當做司公，因為較有水準的攏予人請去矣，只好請這較兩光的來，唸經就烏白唸講:「毛呼龜粿粽，紅包隨你送」。