15 - 利邦上尉遊臺灣-5

(臺文)

艾利.利邦上尉眼中的西拉雅族人

西拉雅族查埔--的，人懸漢大，外形看起來誠粗勇，平常時無穿衫仔褲。若查某囡仔就較細粒子，頂身褪腹裼(thǹg-pak-theh)，干焦縖(hâ)一條一呎長、半呎闊的布身，佮人講話的時，若像布簾仔(nî-á)，順手徙來頭前閘咧；告辭離開閣用手徙到尻川䫌掩咧。

已經結婚的，對外表看會出來，因為結婚的查某囡仔，會共頭前兩支角齒(狗牙)挽掉。

對收成到種作期間，村社佮村社之間時常會發生爭鬥、相刣的事件。一旦若來到種作的期間，村社之間就閣恢復平靜。村社、部落之間的爭鬥，就是掠兩三个人，就歕勝利號，凱旋而歸，第二工就集合兩三百个人宣布，人數依部落大小來定。雙方來來去去，一直到雙方攏取著對方的人頭，才隨人倒轉家己的部落，歡喜慶祝勝利。

西拉雅平埔族無領導人物，上勇敢的人予推捒做部落「老大lāu-tuā」，地位親像基督教的『長老』。

西拉雅人真愛清氣，時常看著有人攑掃帚掃地，厝內、厝外看起來攏清幽、清幽，真是好所在。以上是利邦佇村社所看著的狀況。