85 - 啞口興歕吹，大舌興講話，青盲興跋桮

安住老師，共你請教一下 ，「 阿婆仔穿黛安芬 」 這句孽譎仔話，敢是咧笑遐的足顧人怨的半桶師，明明就毋是這个領域的專家，啊無參加過比賽，嘛無提著專業證書,甚至閣偷用別人的講義 來演講,甚至提來出冊，真正是袂博假博 、足歹款，按呢烏白來、為非糝做實在真不應該 。
阿如， 咱沓沓仔來。頭起先， 「阿婆仔穿黛安芬」 ，意思是講人若老，胸前就會自然下垂，無必要閣假影胸前有海波浪按呢，所以 「阿婆仔穿黛安芬」的意思就是袂博假博 。紲落去，你講伊無專業閣偷用別人的物件來上課、出冊，因為毋是家己的物件，伊講起來一定會㧎㧎 ，緊縒慢會予人看破跤手。俗語講 「 有智識就會博，無知識就會予人揍 」若是這種情形就毋但是袂博假博 、 袂仙假仙 ，甚至已經是 「啞口興歕吹，大舌興講話，青盲興跋桮」 ，有的人是講 「青盲的，興跋桮；跛跤的，興跳童」 ，就是講毋知影家己的缺點，偏偏閣愛烏白展，按呢就會 「曲痀的拋捙輪 食力閣歹看」 。咱愛先聲明一下，咱頭拄仔講的攏是傳統俗語的講法，若是對身障朋友造成困擾，請多多包涵。