13 - 「雙个旋，惡甲無人問

「雙个旋，惡甲無人問」，就是講頭殼頂有兩个旋的囡仔，性地較䆀，有人講足準，嘛有人講無準，橫直我三七講，恁就四六聽。這就是咱臺灣人講話的鋩角，平平一句話，普通講家己攏較好啦，啊若講別人，就會共人剾洗、譬相幾句仔，親像家己剃頭，就講:「一日剃頭，三日緣投」；看別人剃頭，就講:「一日剃頭，三日癮頭」，你看仝款是剃頭，干焦共「緣投」換做「癮頭」，就會當共人剾一下，利用遮的激骨仔話，來增加生活對話的趣味。