97 - 手曲，屈入無屈出

手曲彎來肩胛頭遮，(會使)，足輕可著毋著?所以你看手曲欲彎來肩胛頭，足輕可，但是欲彎去外口就彎袂過，所以「手曲，屈入無屈出」，其實重點是咧講啥？你看咱祖先足𠢕，攏是對大自然當中觀察一寡現象，發展一寡俗語，予咱做人做事做參考。你看「手曲，屈入無屈出」表示啥物意思?講咱攏一定會袒護家己人，另外一種思考是講我較了解伊，伊較有能力、較有才情，所以伊去外口處理這件代誌，我才有法度放心。你若共這款代誌交予另外單位的人，這个到底能力是按怎、喙水如何?毋通代誌無做好予好勢，顛倒閣得失一堆人，按呢我會驚，所以想想咧也是揀我有熟似的人去，按呢做代誌較可靠，所以「手曲，屈入無屈出」，會當用無仝的角度來做思考，這是咱台語趣味的所在，送予聽眾朋友參考。