69 - 十二月食菜頭，六月才轉嗽

咱就共頭仔咧講的咳嗽，揣一寡俗語來佮聽眾朋友分享。頭一句是 :「 舊年食菜頭，今年才轉嗽」， 是咧笑人反應傷慢。明明是舊年就已經發生的代誌，竟然拖到今年才有反應，真正有夠譀。另外，「年頭食鹹菜，年尾才轉嗽」 嘛是這種意思，相信用這句就會當予聽眾朋友隨聽隨了解 「舊年食菜頭，今年才轉嗽」 、「年頭食鹹菜，年尾才轉嗽」的意思。閣較趣味的是這兩句攏是差欲一冬，啊若差半冬就變做 「十二月食菜頭，六月才轉嗽。」